Cantar de Mio Cid

   

   

   

   

   Fablo myo Çid, el que en buen ora çinxo espada:

   „Martin Antolinez, sodes ardida lança:

   Si yo bivo, doblar vos he la soldada.

   Espeso é el oro e toda la plata.

   Bien lo vedes que yo no trayo aver, e huebos me serie

   Pora toda mi compana,

   Fer lo he amidos, de grado non avrie nada.

   Con vuestro cosego bastir  quiero dos archas;

   Yncamos las d´arena, ca bien seran pesadas,

   Cubiertas de guadalmeçi e bien enclaveadas.

   Los guadalmeçis vermejos e los clavos bien dorados.

   Por Rachel e Vidas vayades de privado:

   Quando en Burgos me vedaron conpra e el Rey me a ayrado,

   Non puedo traer el aver, ca mucho es pesado;

   Empenar gelo he por lo que fuere guisado;

   De noche lo lieven, que non lo vean christianos.

   Vealo el Criador con todos los sos santos,

   Yo mas non puedo e amydos lo fago.“

   Martin Antolinez non lo de tarua,

   (Por Rachel e Vidas a priessa demandava.)

   Passo por Burgos, al castiello entrava,

   por Rachel e Vidas a priessa demandava.

   Rachel e Vidas en uno estavan amos,

   En cuenta de sus averes, de los que avien ganados.