In taberna quando sumus


In taberna quando sumus,
non curamus quid sit humus,
sed ad ludum properamus,
cui semper insudamus.
quid agatur in taberna
ubi nummus est pincerna,
hoc est opus, ut quaeratur;
si quid loquar, audiatur.
Quidam ludunt,
quidam bibunt,
quidam indiscrete vivunt.
Ssed in ludo qui morantur,
ex his quidam denudantur,
quidam ibi vestiuntur,
quidam saccis induuntur;
ibi nullus timet mortem,
sed pro Baccho mittunt sortem.
Primo pro nummata vini;
ex hac bibunt libertini;
semel bibunt pro captivis,
post haec bibunt ter pro vivis,
quater pro Christianis cunctis,
quinquies pro fidelibus defunctis,
sexies pro sororibus vanis,
septies pro militibus silvanis.
octies pro fratribus perversis,
nonies pro monachis dispersis,
decies pro navigantibus,
undecies pro discordantibus,
duodecies pro paenitentibus,
tredecies pro iter agentibus.
Tam pro papa quam pro rege
bibunt omnes sine lege.
Bibit hera, bibit herus,
bibit miles, bibit clerus,
bibit ille, bibit illa,
bibit servus cum ancilla,
bibit velox, bibit piger,
bibit albus, bibit niger,
bibit constans, bibit vagus,
bibit rudis, bibit magus,
bibit pauper et aegrotus,
bibit exul et ignotus,
bibit puer, bibit canus,
bibit praesul et decanus,
bibit soror, bibit frater,
bibit anus, bibit mater,
bibit ista, bibit ille,
bibunt centum, bibunt mille.
Parum sescentae nummatae
durant cum immoderate
bibunt omnes sine meta,
quamvis bibant mente laeta;
sic nos rodunt omnes gentes,
et sic erimus egentes.
qui nos rodunt, confundantur
et cum iustis non scribantur.










                                 Cantio aplhabetica de mulieribus


Audite alphabetica

cantica sophistica,

cuius sit amor generis

et favor mulieris.


Bilingwis mulier,

instabilis ut aer,

decipit quam plures,

velud in nocte fures.


Cruenta bestia

tendit ad terrestria,

delusio, destructio

status personalis.


Dolosa, valida,

ad omne malum valida,

derisio, decepcio,

fame, claritatis.


Ewam pronunncians

viri fallatricem,

eius cave presenciam

velud dampnatricem.


Furtive subtrahit,

fugias saltatricem,

eius cave presenciam,

agnosce meretricem.


Garula et fatua,

omnis honoris vacua,

gerula mendacii,

verborum comportatrix.


Habentem, non egentem,

facit mendicantem,

dominum superbum

transmutat in servum.


Ignis infernalis,

pena gehennalis,

ira et invidia

ipsam comitantur.


Karitas deifica

per ipsam obfuscatur,

chaos creans malefica:

desiste, amator.

Lustrat per plateas,

pompas et choreas,

visitat parrochias,

scolas et thabernas.


Mediatrix mamone

miseri mechantis,

mors carnis et anime

fit non penitentis.


Neutru vult diligere,

quemque vult amare,

clerlicum decipere

et laycum fraudare.


Omnes fallit homines,

papales, cardinales,

monachos, presbiteros,

decipit prelatos.


Plures parit filios,

ab lege facit spurios,

vult esse heriles,

servos facit viles.


Querit es et obulum,

grossum et florenum,

non querit honorem

sed tendit ad pudorem.


Rectrix senis, iuvenis,

pauperis et divitis,

ipsa lutibundum

totum facit mundum.


Sorbet sapienciam,

deglutit prudenciam

ut fecit Sampsoni,

Platoni, Salomoni.


Tondet tua, tenet sua,

turpet, torquet animum,

frivolum, zelotipum,

ipsum facit benivolum.


Vacua vacuitas,

vanitatum vanitas,

honorem Deo demus

et cum eo vivemus. Amen.

                                         Omittamus studia



1. Omittamus studia,

dulce est desipere,

et carpamus dulcia

iuventutis tenere!

Res est apta senectuti

seriis intendere,

tenerae sed iuventuti

adhuc decet ludere.


Velox aetas praeterit

studio detenta,

lascivire suggerit

tenera iuventa.


2. Ver etatis labitur,

hiems nostra properat,

vita damnum patitur,

cura carnem macerat.

Sanguis aret, hebet pectus,

minuuntur gaudia,

nos deterret iam senectus

morborum familia.


Velox etas praeterit

studio detenta,

lascivire suggerit

tenera iuventa.


3. „Imitemur superos!“

digna est sententia,

et amoris teneros

iam venantur retia.

Voto nostro serviamus!

Mos est iste numinum.

Ad plateas descendamus

et choreas virginum!


Velox etas praeterit

studio detenta,

lascivire suggerit

tenera iuventa.


4. Ibi, que fit facilis,

est videndi copia,

ibi fulget mobilis

membrorum lascivia.

Dum puelle se movendo

gestibus lasciviunt,

asto videns, et videndo

me michi subripiunt.


Velox etas praeterit

studio detenta,

lascivire suggerit

tenera iuventa.