Nos Fridericus, plebanus de Chunigisperch, tenore presentis littere publice profitemur et scire
cupimus universi ipsam literam inspecturis, quod ius patronatus sive collacionis parrochie
Chunigisperch, cui multo prefuimus tempore cura et nomine pastorali solummodo ad religiosos et
honorabiles in Christo viros domini abbatem et monachos conventus monasterii Waldsassensis pertinet
tamquam ad legittimos collationis dominos et patronos. Et quia propter senium, quo gravamur, diem
mortis cottidie prestolamur, hanc consribi iussimus pro nostre protestacionis testimonio, evidencia
et noticia tam presentium, quam etiam futurorum et ipsam litteram sigillo domini Sifridi decani de
Valckenau atque nostro volumus communiri, parati sumus etiam pro confirmacione prescriptorum iurare
genus quodlibet sacramenti quocumque loco et tempore viventes super ipso fuerimus negocio
requisiti. Datum anno Domini Mo CCo nonagesimo, feria secunda post dominica septuagesime.