Denique barones regni Bohemiae qui iam dudum per dissensiones se opposuerant duci Carinthiae
   supradicto audientes virginem Elizabeth captivitatis suae vincula evasisse singuli
   concurrebant ad eam et qualiter eundem Henricum ducem Carinthiae expellere possent de regno
   consilium inierunt. Copiosum exercitum congregant, Pragam adeunt et praedictum Henricum tunc
   in castro Pragensi morantem potenter invadunt. Inde fit ut inter barones regni et gentes dicti
   Carinthiae ducis bellum maximum exoriatur. Postremo tamen gentibus ducis Carinthiae per
   barones regni bello victis plures capti sunt et reliqui qui poterant in Pragense castrum
   confugerunt praefato duce Carinthiae in turri prima castri Pragensis sedente et damnosum sibi
   spectaculum hoc vidente. Cum rex Iohannes, Elizabeth regina et omnis eorum exercitus civitatem
   Pragensem intravissent, Henricus dux Carinthiae media nocte cum domina Anna coniuge sua ac
   tota familia latenter nemine persequente fugit de Pragensi castro eo post se apertis ianuis
   relicto.