Excerpta ex MGH - Monumenta Germaniae Historica - Brepols

                                      FREDEGARIUS SCHOLASTICUS

                               Chronicarum libri IV, SS rer. Merov. 2

   Liber III, 20-21

   3. 20. Tunc ad presens Glodoveo perducetur, ipsamque in matrimonium Chlodoveus accepit, quam
   culto regale perfecto dilixit amore. Habebat iam tunc Chlodoveus filium de concubina nomen
   Theudericum. Chrotechildis cum primogenitum filium habuisset, quem baptismum consecrare
   vellit, verum adsiduae suadens, christianus efficere, nullatenus ad conciliandum regis animus
   movebatur, dicens: 'Deorum nostrorum iussione cuncta creantur; Deus vester nihil posse
   manifestatur'. Regina filium ad baptismum exibet. Baptizatus autem puer, quem Ingomerem
   vocitabant, in albis obiit. Qua de causa permutus felle rex, increpabat regina, dicens: 'In
   nomine deorum meorum puer fuisset, vixerat'. Regina Deo omnipotenti gratias agens, ut de utero
   suo genitum in regno suo acceperit. Post hunc genuit filium, quem Chlodomere vocavit. Cum
   baptizatus aegrotare coepisset, dicebat rex: 'Et isti, sicut frater, moritur'. Orante matre,
   Domino adiuvante, convaluit. Regina tamen adsiduae regi verbis blandiciis ad Christi cultum
   suadebat.

   3. 21. Cumque bellum contra Alamannus Glodoveus rex moverit, suadente regina, vovit, si
   victuriam obtenebat, effecerit christianus. Cumque uterque phalangiae certamine iungentes,
   dixitque Chlodoveus: 'Deum invoco, quem Chrotechildis regina colit; si me iobaret in hoc
   prilium, ut vincam hos adversarius, eroque illi fidelis'; Alamanni terga vertentes, in fugam
   lapsi. Cumque regem suum cernerint interemptum, novem ann. exolis a sedibus eorum nec ullam
   potuerunt gentem conperire, qui ei contra Francos auxiliaret; tandem se dicionem Chlodoviae
   subdunt. Nam cum de prilio memorato superius Chlodoveus Remus fuisset reversus, clam a sancto
   Remedio Remensis urbis episcopum, adtrahentem etiam Chrotechilde regina, baptismi gratiam cum
   sex milia Francis in pascha Domini consecratus. Cum a sanctum Remedium in albis euangelio
   lectio Clodoveo adnunciaretur, qualem dominus noster Iesus Christus ad passionem venerat,
   dixitque Chlodoveus: 'Si ego ibidem cum Francis meis fuissem, eius iniuriam vindicassim'. Iam
   fidem his verbis ostendens, christianum se verum esse adfirmat.

   3. 22. Gudegiselus, frater Gundobadi, solatium per laegatis Chlodoveo postulans, cum eum
   conperisset fortissimo in prilies, promittens, si eiecerit Gundobadum cum suo solatio a regno,
   tributum partibus Clodoviae dissolverit. Gundobadus ignorans dolum fratris Godegiselus, ad eum
   misit, dicens: 'Veni, ut resistamus Francis unianimiter, ut quod aliae gentes passi sunt non
   perferamus'. Ad ille: 'Vadam', inquid, 'et prebeam tibi auxilium'. Chlodoveus cum Francis
   adversus hos duos regis castra Divionense campania dirixit ad prilium. Godegyselus Chlodoveo
   coniungetur, ac uterque exercitus Gundobado populo adterit. Ad ille dolo fratris cognuscens,
   terga vertit; Rodani ripam percurrens, Avenionem urbem ingreditur. Godegisilus, obtenta
   victuria, promissa Chlodovio ex parte emplens, Viennamque triumphans. Chlodoveus rex post
   Gundobadum dirigit, eumque de civitate extragi vellit.