Cronica Francisci Pragensis

   Liber tercius secunde partis cronice

   Capitulum XXI. De obitu regis Bohemie

   Cum iam exercitus convenissent, rex Bohemiae cum filio suo, electo rege Romanorum, viriliter
   congressi aciem belli tenuerunt. Sed quia eventus bellorum dubius esse frequentius dinoscitur,
   multis maxime per sagittas prostratis et interemptis maior pars Francigenarum terga vertit et
   multis aliis occasionem fugae dederunt. Cum autem nobiles regni Bohemiae conspicerent
   periculum vitae affuturum esse, suaserunt regi, ut cum eis de bello secederet. Qui respondit
   se nolle hoc crimen gloriae suae inferre et famam suam ex hac causa denigrare, sed mandavit
   eis, ut ducerent eum, ubi maior impetus et vigor belli esset fragorque armorum. Cui unus ex
   nobilibus Bohemiae respondit: „Nos illuc vos ducemus, unde amplius vobiscum non redibimus.“
   Cumque hoc effectui mancipavissent, rex Bohemiae, heu, cum pluribus principibus, baronibus et
   militibus de diversis mundi partibus cecidit et est interemptus, glorioso principe Karulo
   difficulter cum vita transeunte et pauca militia secum manente. Post haec rex Angliae cum suis
   nobilibus regem Bohemiae et alios principes, qui in bello ceciderant, honorificae sepulturae
   tradiderunt.