Vie de Saint Alexis


   Bons fut li siecles al tens ancïenor,

quer feit i ert e justise et amor,

si ert credance, dont or n´i at nul prot ;

toz est mudez, perdude at sa color,

ja mais n´iert tels com fut as ancessors.

   Al tens Noë et al tens Abraam

et al David cui deus par amat tant

bons fut li siecles, ja mais n´iert si vaillanz.

vielz est e frailes, tot s´en vait declinant,

si´st empeiriez, toz biens vait remanant.

   Puis icel tens que deus nos vint salver,

nostre ancessor ourent crestïentet,

si fut uns sire de rome la citet ;

riches hom fut de grant nobilitet ;

por çol vos di d´un suen fil vueil parler.

   Eufemiiens (ensi out nom li pedre)

cons fut de Rome del mielz qui donc i eret ;

sour toz ses pers l´amat li emperedre,

donc prist moillier vaillant et onorede

des mielz gentilz de tote la contrede.

   Puis converserent ensemble longement,

qued enfant n´ourent, peiset lor en fortment ;

deu en apelent andoi parfitement ;

´e! reis celstes, par ton comandement

enfant nos done qui seit a ton talent´.

   Tant li preierent par grant umilitet,

que la moillier donat feconditet :

un fil lor donet, si l´en sourent bon gref.

de saint batesme l´ont fait regenerer,

bel nom li metent solonc crestïentet.

   Batisiez fut, si out nom Alexis.

qui l´out portet volentiers le nodrit.

puis li bons pedre ad escole le mist ;

tant aprist letres que bien en fut guarniz.

puis vait li enfes l´emperedor servir.

   Quant veit li pedre que mais n´avrat enfant

mais que cel sol cui il par amat tant,

donc se porpenset del siecle ad en avant :

or vuelt que prenget moillier a son vivant ;

donc li achatet filie adun noble franc.

   Fut la pulcele de molt balt parentet,

filie ad un conte de Rome la citet ;

n´at plus enfant, lei vuelt molt onorer.

ensemble en vont li doi pedre parler ;

lor dous enfanz vuelent faire assembler.

   Noment le terme de lor assemblement :

quant vint al faire, donc le font gentement.

danz Alexis l´esposat belement,