Union of Krewo (Act of Kreva) - Latin text
Nos Jagalo, virtute Dei dux magnus Litwanorum Rusiaeque dominus et haeres naturalis, notum facimus
quibus expedit universis, praesentium tenorem inspecturis nobis memoriale dicendorum a serenissima
principe Dei gratia E. Regina Ungariae, Poloniae, Dalmaciae etc. per honorabiles et nobiles viros dominos
Stephanum praepositum Chanadiensem, Ladislaum filium Kakas de Kaza castellanum de Potok,
Wlodconem pincernam Cracoviensem, Nicolaum castellanum Zavichostiensem et Cristinum tutorem
Kazimiriensem. Et primo dixerunt, qualiter magnificus princeps Jagalo dux magnus Litwanorum etc. suos
solempnes ambaziatores ad dominos regnicolas Poloniae destinavit, demumque et ad eius reginalem
maiestatem. Hii autem, qui ad reginalem maiestatem fuerunt transmissi, assumpserunt secum litteras
credentiales a potiori, maiori et excellentiori nuntio, videlicet inclito principe Skirgalone duce, fratre
domini Jagalonis ducis nagni, qui ex quibusdam certis causis personaliter ad eiusdem reginalem
maiestatem transire nequivit. Nuntii vero eiusdem, dux Borisz et Hanco capitaneus Vilnensis, eidem
dominae reginae Ungariae taliter exposuerunt et dixerunt: quomodo multi imperatores, reges et principes
diversicum eodem duce magno Litwanorum cupiebant, affectabant et desiderabant parantelam
proximitatis contrahere perpetuam, quod factum Deus cunctipotens usque in personam eiusdem reginalis
maiestatis reservavit. Ideo, serenissima princeps, pro tanto saluberrimo misterio suscipiat vestra maiestas
eundem dominum Jagallonem magnum ducem in filium et inclitissimam principem Hedvigim filiam
vestram carissimam, reginam Poloniae, sibi in legitimam consortem copulantes.
The Legal Path of Polish Freedom 1 / 3
Et exinde credimus laudem Deo, salutem animarum, honorem hominibus et augmentum Regni
extitisse.Dum autem ea, ut praeferuntur, fine terminabuntur ordinato, interdum dominus Jagalo magnus
dux cum omnibus fratribus suis nondum baptisatis, proximis, nobilibus, terrigenis maioribus et minimis, in
suis terris existentibus, fidem katholicam sanctae ecclesiae Romanae nititur, cupit et desiderat amplexari.
Et quia super eo multi imperatores et principes diversi laboraverunt, quod ab eo usque nunc minime
obtinere valuerunt, verumptamen Deus omnipotens hunc honorem ipsius reginali maiestati conservavit. In
huius rei robur, evidentiam et firmitatem idem Jagalo dux magnus promittit universos thezauros suos ad
recuperationem defectuum regnorum utrorumque, tam Poloniae, quam etiam Litvaniae, ponere et
exhibere, et hoc, nisi eadem domina Ungariae filiam suam Hedvigim reginam Poloniae praenarratam sibi
matrimonialiter copulabit. Etiam idem Jagalo dux magnus promittit pactum pecuniae, ratione vadii inter
ipsam dominam reginam Ungariae ex una et ducem Austriae parte ex altera constitutum, videlicet ducenta
milia florenorum dare et exsolvere effective. Itam idem dux Jagalo magnus promittit et spopondit
universas occupationes et defectus regni Poloniae, per quorumvis manus distractas et occupatas, propriis
laboribus et expensis reintegrare.
The Legal Path of Polish Freedom 2 / 3
Item idem Jagal dux magnus promittit cunctos christifideles et praecipue homines utriusque sexus, de
terra Poloniae receptos et more exercituantium transductos, pristinae reddere libertati ita, quod quisquis
eorum vel earum transibit, quo suae licebit voluntati. Demum etiam Jagalo dux saepedictus promittit terras
suas Litvaniae et Rusiae coronae regni Poloniae perpetuo applicare. Et nos Jagalo dux magnus Litwanorum
praefatus praemissas legationes, ex parte nostri per praedictum Skirgalonem fratrem nostrum carissimum
praenominatis dictis baronibus regni Poloniae propositas et modo praehabito declaratas ac demum per
nuntios eiusdem fratris nostri serenissimae principi dominae Elizabet reginae Ungariae praenotatae
similiter et modo praehabito explicatas, in praesentia praedictorum ambaziatorum seu nuntiorum ipsius
dominae reginae, tam Ungarorum, quam etiam Polonorum ad nostram celsitudinem destinatorum, una cum
fratribus nostris infrascriptis, videlicet domino Skirgalone, Coribut, Vitoldo, Ligwen, ducibus Litwanorum,
et in persona aliorum fratrum nostrorum, praesentium et absentium, processisse et tam praedictae dominae
reginae, quam etiam praefatis baronibus regni Poloniae intimasse. Quasquidem legationes cum nostri ac
fratrum nostrorum praescriptorum sigillorum praesentium [appensione] duximus forte ratificatas et per
omnia modis praemissis affirmatas. Datum in Krew feria secunda in vigilia Assumptionis beatae Mariae
virginis gloriosae, anno Domini MCCCLXXX quinto.
Akta unii Polski z Litwą, 1385–1791, wyd. S. Kutrzeba, W. Semkowicz, Kraków 1932, nr 1, s. 1–3.
Powered by TCPDF (www.tcpdf.org)
The Legal Path of Polish Freedom 3 / 3